Leikjavarpið - Hlaðvarp Nörd Norðursins

nordnordursins

Tölvuleikir

Hlaðvarp þar sem fjallað er um það helsta úr heimi tölvuleikja. Umsjónarmenn þáttar eru þeir Bjarki Þór Jónsson, Daníel Rósinkrans og Sveinn Aðalsteinn.

Leikjavarpið #75 – GTA VI upphitun og The Legend of Zelda: Ocarina of Time

Hitum upp fyrir útgáfu Grand Theft Auto VI og ræða um allt milli himins og jarðar, eins og spenninginn sem fylgir útgáfunni, ýmiskonar fróðleik eins og stærðina á kortinu, útgáfukvöld Elko, kóða í boxi og fleira. Einnig er fjallað um hvað foreldrar þurfa að hafa í huga við útgáfu GTA VI - og hvort samband við tölvuleikjakarakter geti mögulega flokkast sem framhjáhald í raunveruleikanum!?  Annað stórt viðfangsefni þáttarins er The Legend of Zelda: Ocarina of Time. Nintendo sérfræðingurinn Daníel Rósinkrans segir sína skoðun á leiknum en hann er mikill aðdáandi Zelda-leikjaseríunnar og búinn að spila alla leikina. Stenst leikurinn væntingar sem einn af betri Zelda-leikjum? Hvaða breytingar er að finna á milli upprunalega leiksins frá árinu 1998 og nýja leiksins (sem kemur eingöngu út á Switch 2)?

Leikjavarpið #74 – Spennandi leikjaútgáfa í nóvember og gervigreind part 2

Sveinn, Bjarki og Daníel fara yfir það helsta úr heimi tölvuleikja og ræða komandi leikjamánuð. Nóvember mun bjóða upp á svakalega leikjaútgáfu en í þeim mánuði koma þrír risaleikir: The Legend of Zelda: Ocarina of Time endurgerðin, Grand Theft Auto VI og World of Warcraft: Forever. Stóra umræðuefnið er - aftur - gervigreindin. Í síðasta þætti Leikjavarpsins var rætt um fjölbreytt áhrif gervigreindar á heim tölvuleikja og höldum við þeirri umræðu áfram í þessum þætti. Margir Steam-notendur kvörtuðu yfir gríðarlegu magni AI-leikja á Steam Next Fest og spurning hvort það þurfi ekki að herða gæðaeftirlit eða merkja AI-leiki með einhverjum hætti. Og hvar drögum við línuna hvaða leikir flokkast sem AI-leikir og hverjir ekki? Daníel kláraði The Blood of Dawnwalker og Bjarki er að spila Star Wars: Galactic Racer þessa dagana. Fjallað stuttlega um leikina tvo í þættinum. Einnig er rætt er um fjölbreytt fréttaefni, þar á meðal lokun BioWare leikjafyrirtæksins, Sýndarvík og væntanlega afmælisveislu Tölvuleikjaspjallsins. Umsjónarmenn eru Daníel Rósinkrans, Sveinn Aðalsteinn og Bjarki Þór

Leikjavarpið #73 - Gervigreind, leikjaútgáfan og meira af Control Resonant

Farið er yfir leikjaútgáfuna í nýjasta þætti Leikjavarpsins en leikir á borð við Hellraiser og Star Wars: Galactic Racer komu út fyrir skemmstu. Fleiri og fleiri leikjafyrirtæki nota gervigreind í auknum mæli, nýverið tilkynnti Capcom að þeir ætla að nota gervigreind í auknum mæli og það sama má segja um Google og Unity. Er þetta jákvæð eða neikvæð þróun? Fjallað er nánar um Control Resonant og tekið fram hvað stóð upp úr og hvað hefði mátt fara betur. Allt þetta og fleira í nýjasta þætti Leikjavarpisins! Umsjónarmenn eru Daníel Rósinkrans, Sveinn Aðalsteinn og Bjarki Þór

Leikjavarpið #72 – Wolverine, Control Resonant og Resident Evil bíómyndin

Sveinn, Daníel og Bjarki ræða um það helsta úr heimi tölvuleikja. Sveinn rýnir í nýja Wolverine leikinn og segir að leikurinn sé töluvert betri en margir vilja meina og að sum gagnrýni sem leikurinn hefur fengið sé að hluta til ósanngjörn. Bjarki er byrjaður á Control Resonant og segir frá fyrstu hughrifum sínum á leiknum eftir að hafa spilað fyrstu tvo klukkutímana. Daníel er í skýjunum - eða öllu heldur geimnum - eftir að hafa klárað Outer Wilds og aukapakkann. Nýlegar leikjafréttir eru einnig til umræðu. Má þar nefna nýjan heim í Minecraft, breytingar hjá Bungie, stöðuna hjá Microsoft og Halo svo eitthvað sé nefnt. Í lok þáttar fjöllum við um nýju Resident Evil bíómyndina en þeir Sveinn og Daníel mættu á sérstaka forsýningu í boði GameTíví.

Leikjavarpið #71 - Zelda 40 ára, BlizzCon og Onimusha: Way of the Sword

Farið er um víðan völl í nýjasta þætti Leikjavarpsins. Fyrir nokkrum dögum hélt Nintendo ekki eina - heldur tvær leikjakynningar. Í annari þeirra var endurgerðin af The Legend of Zelda: Ocarina of Time kynnt nokkuð ítarlega í tilefni 40 ára afmælis The Legend of Zelda leikjaseríunnar. Nintendo kynntir fleiri leiki, þar á meðal Kirby and the World Beyond og Metroid Ravenous, ásamt varningi eins og amiibos og sérstakri Zelda útgáfu af Switch 2 leikjatölvunni. Daníel og Sveinn ræða um Onimusha: Way of the Sword sem þeir hafa verið að spila undanfarna daga. Við snertum aðeins á BlizzCon þar sem stór World of Warcraft uppfærsla var kynnt til sögunnar, Diablo V og nýr væntanlegur StarCraft skotleikur. Sveinn prófaði nýja uppfærslu á Xbox sem leyfir Xbox eigendum að fá stafrænt eintak af þeim leikjum sem spilarar eiga í diskaformi, Sveinn segir frá hvernig sú tækni virkar. Allt þetta og miklu fleira í nýjasta þætti Leikjavarpsins!

Leikjavarpið #70 - GTA VI sýnishornið og diskalaus framtíð Sony

Leikjavarpið er mætt aftur til leiks eftir ljúft og gott sumarfrí! Í þættinum rýnum við í nýjasta sýnishornið úr Grand Theft Auto VI sem var frumsýnt á Netflix á dögunum, þar er um að ræða yfir 20 mínútur af nýju efni. Einnig tökum við fyrir ákvörðun Sony um diskalausa framtíð fyrir PlayStation, breytir það einhverju eða er algjör óþarfi að bjóða upp á diska? Daníel Rósinkrans, Bjarki Þór og Sveinn Aðalsteinn segja sínar skoðanir á málinu. Þetta og margt fleira í sjötugasta þætti Leikjavarpsins!

Leikjavarpið #69 - Fyrstu hughrif á Crimson Desert, DLSS 5 umræða og Pokopia

Daníel Rósinkrans og Sveinn Aðalsteinn ræða um allt það helsta úr heimi tölvuleikja. Þeir ræða tölvuleikinn Crimson Desert og segja frá fyrstu hughrifum á leiknum, taka góða og nauðsynlega umræðu um DLSS 5, tæknina frá Nvidia, og síðast en ekki síst fjalla um Pokopia - nýja Pokémon leikinn sem hefur notið mikilla vinsælda á Switch 2 leikjatölvunni. Allt þetta og fleira til í nýjasta þætti Leikjavarpsins!

Leikjavarpið #68 - God of War Sons of Sparta og Phil Spencer kveður Xbox

Daníel Rósinkrans og Bjarki Þór fara yfir það helsta úr heimi tölvuleikja. Daníel segir okkur frá God of War Sons of Sparta sem er heldur óhefðbundinn God of War leikur í platformer-stíl. Einnig er rætt um stórar fréttir úr heimi Microsoft Xbox og Sony PlayStation; Phil Spencer kveður Microsoft og Sony lokar Bluepoint Games leikjastúdíóinu. Ýmislegt fleira er til umræðu, þar á meðal byrjendaráð fyrir nýjan Switch 2 eiganda, Pokémon fréttir, leikir í spilun, nýr leikur væntanlegur frá nýju íslensku leikjafyrirtæki, upphitun fyrir gjafaleik og margt fleira.

Leikjavarpið #67 - State of Play og Nioh 3

Daníel Rósinkrans, Steinar, Bjarki og Sveinn fara yfir allt það helsta úr heimi tölvuleikja í þætti 67 af Leikjavarpinu. Okkar helsti Nintendo sérfræðingur fer yfir það helsta frá Nintendo Direct: Partner Showcase þar sem væntalegir Switch og Switch 2 leikir voru kynntir. Steinar og Sveinn rýna í Nioh 3 og fjalla um nýjunga, helstu kosti og galla leiksins ásamt því að segja frá sínu áliti. Að lokum rennum við yfir leiki sem voru kynntir á State of Play kynningu Sony, þar sem við fengum meðal annars nýjar God of War fréttir! Einnig förum við yfir það helsta sem við erum að spila þessa dagana, ræðum Cairn stuttlega, minnumst á nýja Diablo II viðbót og margt fleira.

Leikjavarpið #66 - Xbox Developer Direct og Ólafur Darri í God of War

Sveinn, Rósinkrans og Bjarki fara yfir það helsta og heitasta úr heimi tölvuleikjanna í 66. þætti Leikjavarpsins. Stóra viðfangsefni þáttarins er Xbox Developer Direct leikjakynningin sem fór í loftið 22. janúar síðasliðinn þar sem fjórir væntanlegir leikir fengu ítarlega kynningu, þar á meðal leikurinn sem strákarnir bíða spenntir eftir - FABLE! Rætt er um nýlega og væntanlega sjónvarpsþætti sem byggja á tölvuleikjum í kjölfar þess að tilkynnt var að Ólafur Darri mun fara með hlutverk Þórs í God of War sjónvarpsþáttum! Það gleymdist að nefna nokkra áhugaverða leikjatitla í seinasta þætti þegar farið var yfir væntanlega tölvuleiki á árinu 2026, þau mistök eru plástruð í lok þáttar <3 Ást, friður og tölvuleikir.

Þér gæti líka líkað...