Hjólað allt árið

Sífellt fleira fólk velur að hjóla allt árið. Anna Hulda Ólafsdóttir skrifstofustjóri loftslagsþjónustu og aðlögunar hjá Veðurstofunni er ein þeirra sem hjólar nær allra sinna ferða. Hún segir innviðauppbyggingu á borð við hjólastíga skipta máli en að réttur búnaður og gott hjól skipti ekki síður máli. Þá sé mikilvægt að vinnustaðir geri fólki það auðveldara að fara til vinnu á hjóli, til dæmis með góðum hjólageymslum.

Fyrsti eiginlegi hjólastígurinn var lagður á smá spotta á Laugaveginum fyrir rétt tæpum tveimur áratugum. Síðan þá hafa sérgreindir hjólastígar teygt sig nokkra tugi kílómetra um höfuðborgarsvæðið og einnig um landsbyggðina. Pawel Bartoszek er formaður svæðisskipulagsnefndar höfuðborgarsvæðisins og situr í umhverfis- og skipulagsráði Reykjavíkur. Hjá borginni er markmiðið að tíu prósent allra ferða verði farnar á hjóli árið 2025. Pawel segir að árið 2030 sé stefnt að því að fullburða net hjólastíga verði orðið að veruleika í höfuðborginni.