Þetta helst

RÚV

Fréttir

Daglegur þáttur um stór og lítil fréttamál í umsjón Inga Freys Vilhjámssonar og Ingvars Þórs Björnssonar.

Vistkerfi íslenskra bókmennta

Opinber stuðningur við bókmenntir er verðmætaskapandi fyrir íslenskt hagkerfi. Það sem stjórnvöld hafa gert til að styðja við sköpun íslenskra bókmennta hefur á síðustu árum skipt sköpum fyrir bókaútgáfu en opinbert fjármagn sem rennur til bókmennta hefur engu að síður dregist saman síðustu ár. Þetta kemur fram í nýrri skýrslu sem unnin var fyrir Menningar-, nýsköpunar- og háskólaráðuneytið. Hákon Gunnarsson, rekstrarhagfræðingur, fékk það verkefni að gera fjárhagsgreiningu á virðiskeðju íslenskra bókmennta.

Deilur um umdeildan dansara

Deilur hafa staðið yfir í samfélagi samkvæmisdansara í Reykjavík sem hverfast um mann á miðjum aldri sem hefur verið vændur um meinta ósæmilega og meinta ólöglega hegðun gegn unglingsstúlkum. Hann hefur verið dansari í áratugi og tekið þátt í keppnum og orðið Íslandsmeistari auk þess sem hann hefur þjálfað börn og unglinga. Umræddur maður hefur verið kærður til lögreglu vegna hegðunar sinnar, síðast árið 2021, en kærunum hefur verið vísað frá. Deilan snýst um það hvort hægt sé að banna manninum að vera félagsmaður og iðkandi í skráðu íþróttafélagi, Dansfélagi Reykjavíkur. Félagið er aðili að Íþróttasambandi Íslands og er því háð lögum, reglum og samþykktum íþróttahreyfingarinnar. Dómstóll ÍSÍ hefur ítrekað dæmt manninum í hag og sagt að ekki sé hægt að banna honum að vera félagi í Dansfélagi Reykjavíkur. Forsvarsmaður dansfélagsins, Kara Arngrímsdóttir, er ekki sátt við stöðu málsins og telur ekki hægt að maðurinn fái að iðka dans innan félagsins. Rætt er við Köru og Örnu Sif Haukstein Knútsdóttur sem kærði manninn til lögreglu árið 2021. Umsjón: Ingi Freyr Vilhjálmsosn

Hlutfall erlendrar neyslu aldrei hærra

Í þætti dagsins beinum við sjónum að þeirri staðreynd að hlutfall kortaveltu Íslendinga sem fer fram erlendis hefur aldrei mælst hærra - og áhrifum þess á innlenda verslun. Árið 2022 var erlend netverslun Íslendinga um 23 milljarðar króna. Á síðasta ári var hún  komin í 34,5 milljarða og samkvæmt mati Rannsóknarseturs verslunarinnar er búist við að hún fari í allt að 40 milljarða á þessu ári. Rætt er við Benedikt S. Benediktsson, framkvæmdastjóra Samtaka verslunar og þjónustu, og Hjalta Óskarsson, hagfræðing hjá Landsbankanum. Umsjón: Ingvar Þór Björnsson

Á slóð gjaldþrota á veitingamarkaði

Elís Árnason veitingamaður segist hafa orðið fyrir altjóni þegar hann seldi kaffihúsið Adesso og veitingastaðinn Sport og Grill í Smáralind árið 2024. Hann seldi þessa staði til fjárfestanna Helga Magnúsar Hermannssonar og Jóhannesar Birgis Skúlasonar og að hann hafi bara fengið lítinn hluta kaupverðsins greiddan. Elís segist á endanum hafa þurft að taka tugmilljón króna bankalán til að borga til baka lán sem hvíldu á fyrirtækjunum og hann var í persónulegum ábyrgðum fyrir. Hann segir tjón sitt í viðskiptunum nema um 100 milljónum. Helgi Magnús hefur ítrekað verið til umfjöllunar í fjölmiðlum síðustu mánuðina vegna fyrirtækja sem hann hefur átt sem farið hafa í þrot eða verið lokað af yfirvöldum. Í síðustu viku var sagt frá því að Skatturinn og lögreglan hefðu innsiglað Hamborgarafabrikkuna á Höfðatorgi. Fjallað er um þessa sögu í þætti dagsins og rætt við Elís, Helga Magnús og fleiri viðmælendur. Umsjón: Ingi Freyr Vilhjálmsson

Stafrænt fullveldi á tímum tæknirisa

Í dag beinum við sjónum okkar að stafrænu fullveldi þjóðar á tímum þar sem landsmenn, stofnanir, fyrirtæki og stjórnvöld reiða sig mjög á erlenda tæknirisa í leik og starfi. Víðtækar truflanir urðu í forritum Microsoft um heim allan fyrir helgi. Rætt er við Dagbjörtu Hákonardóttur, þingmann, Hafstein Einarsson, dósent í tölvunarfræði, og Guðmund Hálfdánarson, prófessor emeritus í sagnfræði. Umsjón: Ingvar Þór Björnsson.

Sérstök endalok Hamborgarafabrikkunnar

Lokun Hamborgafabrikkunnar í Katrínartúni vakti talsverða athygli á miðvikudaginn. Skatturinn og lögreglan mættu á veitingastaðinn og innsigluðu hann. Almennt séð fara skatturinn og lögreglan ekki í slíkar aðgerðir gegn veitingahúsum og öðrum fyrirtækjum nema að þau skuldi skatta eða opinber gjöld, Hvað gerðist eiginlega hjá Hamborgarafabrikkunni og af hverju lokaði staðurinn? Athygli vekur að fyrri eigendur veitingastaðarins seldu hann til nýrra eigenda í mars eftir að hafa skilað tapi árið á undan og eftir að hafa reynt að selja staðinn um hríð. Nýi eigandi staðarins var sjávarútvegsfyrirtæki með enga reynslu á veitingamarkaði og hætti framkvæmdastjóri nýju eigenda Hamborgarafabrikkunnar hjá staðnum í byrjun júní. Umsjón: Ingi Freyr Vilhjálmsson

Farsímasamband ekki öryggiskerfi almennings

Íbúar í dreifbýli segja farsímasamband hafa versnað verulega eftir að slökkt var á 2G og 3G kerfunum í júní. Sambandsleysið hefur áhrif á öryggi fólks, atvinnurekstur og daglegt líf. Fjarskiptastofa viðurkennir að samband gæti hafa versnað sumstaðar en batnað annarstaðar. Stofnunin hefur takmarkaðar heimildir til inngripa. Niðurstöður umfangsmikilla mælinga á útbreiðslu farsímasambands liggja fyrir í byrjun desember.

Samherjagátan 2019-2025

Skattgreiðslur til íslenska ríkisins vegna viðskipta Baldvins Þorsteinssonar og systur hans Kötlu Þorsteinsdóttur með hlutabréf í útgerðarfélaginu Samherja á árunum 2019 til 2025 nema samtals um 7,2 milljörðum króna. Baldvin Þorsteinsson, forstjóri og annar stærsti hluthafa Samherja, svarar spurningum fréttastofu um þessi viðskipti og skattgreiðslur vegna þeirra. Um miðjan maí vorið 2020 var sagt frá því að Katla og Baldvin væru orðin stærstu hluthafar Samherja. Mikið var fjallað um þessi viðskipti í fjölmiðlum á þeim tíma og hafa verið sagðar margar framhaldsfréttir um þau síðastliðin ár. Helsti kjarninn í umræðunni um viðskiptin árið 2020 var að þau snérust um kvóta og kvótakerfið og hvernig fyrirtæki sem ráða yfir þessari sameign þjóðarinnar fara á milli kynslóða. Viðskiptin hafa farið fram í nokkrum liðum í gegnum árin og er hér reynt að kortleggja heildarumfang þeirra. Umsjón: Ingi Freyr Vilhjálmsson

Bankarnir hagnast vel á meðan deilt er um bankaskatt

Stóru viðskiptabankarnir þrír - Íslandsbanki, Arion banki og Landsbankinn - birtu um mánaðarmótin uppgjör fyrir fyrstu níu mánuði ársins. Kvika banki fylgdi síðan í síðustu viku. Þegar litið er til stóru bankanna þriggja sést að þeir skiluðu samanlagt um 79 milljörðum króna í hagnað á fyrstu níu mánuðum ársins. Í þætti dagsins er sjónum beint að stöðu og hagnaði bankanna - og deilum um bankaskatt. Rætt er við Snorra Jakobsson, hagfræðing, og Breka Karlsson, formann Neytendasamtakanna. Umsjón: Ingvar Þór Björnsson

Umræðan um sölu ríkiseignar í Laugarási

Íslenska ríkið hafði til skoðunar að selja tilteknum lækni 370 fermetra íbúðarhús í Laugarási í Bláskógabyggð með sérstakri heimild sem óskað var eftir með breytingum á fjárlögum í fyrra. Beiðnin um söluna á húsinu kom frá heilbrigðisráðuneytinu, Það sem er óvenjulegt við málið er að til stóð að ríkið seldi þetta einbýlishús beint til læknisins án auglýsingar á opnum markaði. Sveitarstjórinn í Bláskógabyggð segir að það sé óvenjulegt fyrirkomulag að til standi að selja ríkiseign beint til einstaklings með þessum hætti og að talsvert hafi verið rætt um málið í sveitarfélaginu. Lækninnn og forstjóri Ríkiseigna segja að ekkert verði af sölu hússins með þessum hætti og að á endanum standi til að selja það með opnum hætti á markaði. Umsjón: Ingi Freyr Vilhjálmsson

Þér gæti líka líkað...