Samsæriskenningasmiður sektaður um milljarð dollara

Samsæriskenningasmiðurinn Alex Jones er í vandræðum. Hann er einn sá alræmdasti sinnar tegundar í Bandaríkjunum og hefur þurft að súpa seyðið af því. Hann fullyrti trekk í trekk að skotárásin í Sandy Hook grunnskólanum í Conneticut, þar sem 26 voru skotin til bana, þar af 20 lítil börn, hafi raunverulega ekki gerst. Nánar tiltekið sagði hann í þættinum sínum Info Wars að þetta hafi allt saman verið sett á svið af bandarískum stjórvöldum. Með leikurum. Til að herða byssulöggjöfina. Hann var ákærður fyrir þessar lygar. Í ágúst var hann dæmdur til að greiða foreldrum drengs sem var myrtur í Sandy Hook bætur, 45 milljónir Bandaríkjadala. Og í gær, 12. október, komst kviðdóm­ur við dóm­stól í Water­bury í Conn­ecticutað þeirri niður­stöðu að Jo­nes skyldi greiða 965 millj­ón­ir dala hið minnsta, and­virði 139,2 millj­arða ís­lenskra króna, í skaðabæt­ur til fleiri aðstand­enda fórn­ar­lamba skotárás­ar­inn­ar. Milljarður dollara. Þórhildur Ólafsdóttir rakti sögu máls Alex Jones og foreldra barnanna í Sandy Hook í Þetta helst í byrjun ágúst, þegar Jones fékk fyrsta dóminn. Mögulega fyrsta dóminn af mörgum. Sagan hefst árið 2012, þann 14. desember. Jólin voru að nálgast í bænum Newtown í Conneticut í Bandaríkjunum.